"Ermənistanın dəmir yolları Rusiyanın nəzarəti altında olduğuna görə, hazırda Ermənistanı beynəlxalq dəmir yolu şəbəkəsinə inteqrasiya etmək üçün bu tarixi fürsəti itirmək təhlükəsi ilə üzləşirik. 

Gundemxeber.org  xarici KİV-ə istinadən xəbər verir ki, bunu Ermənistanın Baş naziri Nikol Paşinyan Parlamentdə açıqlayıb. 

"Dəmir yolu Ermənistanın mülkiyyətidir, lakin Rusiya Dəmir Yollarının idarəçiliyindədir. Biz Rusiyaya və onun maraqlarına hörmətlə yanaşırıq, amma bu tarixi fürsəti əldən verə bilmərik. Rusiyalı tərəfdaşlarımızdan çeviklik göstərmələrini və konsessiya hüquqlarını Ermənistan və Rusiya üçün məqbul olan üçüncü bir ölkəyə satmalarını xahiş edirik. TRIPP layihəsinə həvəsli və investisiyalara böyük maraq göstərən beynəlxalq investorlar Yerasx-Axurik dəmir yolu hissəsini keçməyin yollarını axtarırlar. Onlar elə bir sxem axtarırlar ki, yük Nrnadzor-Aqarak dəmir yolu ilə Naxçıvana daxil olduqdan sonra Ermənistan dəmir yolu ilə deyil, Ermənistan dəmir yolundan yan keçərək qərbə doğru səyahətinə davam etsin", - deyə o qeyd edib. 

Baş nazir bunun böyük problem olduğunu bildirib: "Çünki belə bir ssenaridə Ermənistan böyük gəlirlərini, investisiyalarını, potensialını, iş yerlərini və inkişaf imkanlarını itirir. Bəs niyə investorlar, yük ekspeditorları, mal satıcıları və alıcıları Yerasx-Axurik dəmir yolundan yayınmaq istəyirlər? Sadə bir səbəbə görə: dəmir yolunun həmin hissəsi tamamilə Ermənistana məxsus olsa da, Rusiya Dəmir Yollarının idarəçiliyindədir və Rusiya ilə Qərb arasındakı mürəkkəb münasibətlər, Rusiyaya tətbiq olunan sanksiyalar beynəlxalq investorları, yük ekspeditorlarını və ticarət iştirakçılarını bundan yayınmağa, bunu risk hesab etməyə və risk götürməməyə məcbur edir.

Xüsusən də TRIPP vasitəsilə yük daşımalarının ən böyük müştərilərinin Rusiyaya qarşı sanksiyalar tətbiq edən ölkələr olacağını nəzərə alsaq, onlar hesab edirlər ki, bu cür infrastrukturlarla işləmək risklidir. Ermənistanın Rusiyaya qarşı tətbiq edilən sanksiyalarla heç bir əlaqəsi və ya təsiri olmadığı aydındır. Aydındır ki, Ermənistan dəmir yolunun Rusiya dəmir yollarının idarəçiliyində olması ilə bağlı da heç bir problemimiz yoxdur, bu, bizim üçün problem olmayıb və biz heç vaxt bu mövzuya toxunmamışıq".

Gundemxeber.org