Milli Kitabxanada “Əfzələddin Xaqani Şirvani” adlı elektron məlumat bazası istifadəçilərə təqdim edilib.

Kitabxanadan  bildirilib ki, məlumat bazasında böyük Azərbaycan şairi Xaqani Şirvaninin 900 illik yubileyinin qeyd edilməsi haqqında ölkə başçısının Sərəncamı, “Əfzələddin Xaqani Şirvani”, “Tarixləşən ömür”, “Şair haqqında nəşrlər”, “Yaradıcılıq nümunələri”, “Xaqani yaradıcılığı və ədəbi irsi”, “Şirvani irsi dünya universitet kitabxanalarında”, “Xaqani Şirvani haqqında fikirlər”, “Xatirəsinin əbədiləşdirilməsi”, “Xaqani rəsmlərdə” və “Videoqalereya” bölmələri yer alıb.

Elektron məlumat bazasında Xaqani Şirvaninin müxtəlif illərdə nəşr olunmuş əsərləri və onların tam mətnli elektron versiyaları, şair haqqında yazılmış monoqrafiyalar, elmi məqalələr, dissertasiyalar, dövri mətbuat materialları, foto və videomateriallar sistemli şəkildə toplanıb.

Məlumat bazası geniş oxucu auditoriyası, tədqiqatçılar, müəllimlər, tələbələr və Xaqani Şirvaninin zəngin irsi ilə maraqlanan hər kəs üçün etibarlı informasiya mənbəyi olmaqla yanaşı, klassik Azərbaycan ədəbi irsinin təbliği və öyrənilməsinə mühüm töhfə verir.

Gundemxeber.org

“Müasir Yaradıcılığa Dəstək” İctimai Birliyi “Yenidən doğulan torpağın övladları” adlı yaradıcılıq master-klasları layihəsinin icrasına başlayıb.

Təşəbbüsün əsas məqsədi Qarabağda və Şərqi Zəngəzurda doğma yurdlarına qayıdan uşaqların asudə vaxtını səmərəli və məzmunlu təşkil etmək, onların yaradıcılıq potensialını üzə çıxarmaqdır.

Gundemxeber.org xəbər verir ki, layihə çərçivəsində tədbirlər Cəbrayıl rayonunun Horovlu kəndində təşkil olunacaq və ustad dərslərinə ətraf ərazilərdə yaşayan gənclər cəlb ediləcək.

Layihə çərçivəsində təşkil olunacaq proqram beş əsas istiqaməti əhatə edir:

- bədii təxəyyülü inkişaf etdirən rəsm;

- mütaliə və yazı bacarıqlarını formalaşdıran ədəbiyyat;

- səhnə nitqini və sosial inteqrasiyanı inkişaf etdirən teatr;

- mənəvi rahatlıq bəxş edən musiqi;

- eləcə də fiziki və ruhi sağlamlığı təşviq edən sağlam həyat tərzi.

Təlimlər uşaqların, gənclərin yaradıcılıq qabiliyyətlərini artırmaqla yanaşı, onların sosiallaşmalarına və sağlam həyat tərzi mənimsəmələrinə dəstək verəcək.

Qeyd edək ki, layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilir.

Gundemxeber.org

Azərbaycan muzeylərində virtual (VR) və artırılmış reallıq (AR), 360 dərəcəlik turlar, eləcə də süni intellekt texnologiyalarının tətbiqi nəzərdə tutulur.

Bu barədə Mədəniyyət Nazirliyinin Yaradıcı sənayelər və rəqəmsal inkişaf şöbəsinin müdiri Fuad Maqsudov məlumat verilib.

Bildirib ki, yaxın illərdə müasir rəqəmsal həllərin muzey, qalereya və sərgilərdə mədəni irsin təqdimatı imkanlarının genişləndirilməsi və ziyarətçilər üçün yeni təcrübənin yaradılması məqsədilə istifadəsi planlaşdırılır. Bunun üçün beynəlxalq təcrübə öyrənilir, müvafiq texnologiyaların tətbiqi mexanizmləri hazırlanır və zəruri texniki infrastruktur formalaşdırılır.

“Eyni zamanda, muzey fondlarının rəqəmsallaşdırılması davam etdirilir. “e-Culture” rəqəmsal inkişaf strategiyası çərçivəsində eksponatların rəqəmsallaşdırılması, onlar haqqında məlumatların sistemləşdirilməsi və vahid informasiya resursunda birləşdirilməsi istiqamətində iş aparılır. Muzey, qalereya və sərgilərdəki eksponatların QR kodlarla təchiz edilməsi də nəzərdə tutulur.

Vahid Mədəniyyət Reyestrinə daxil edilən “Milli mədəniyyət əmlakının Dövlət Siyahısı” çərçivəsində Azərbaycan Dövlət Rəsm Qalereyasının 12 498, Milli İncəsənət Muzeyinin isə 17 053 eksponatı artıq rəqəmsal formata keçirilib.

Növbəti mərhələdə muzeylərin rəqəmsal məlumat bazalarının genişləndirilməsi, informasiya resurslarının inteqrasiyası və məlumatlara əsaslanan idarəetmə modelinin tətbiqi planlaşdırılır. Həmçinin analitik alətlərdən istifadə və Vahid Mədəniyyət Reyestrinin daha da inkişaf etdirilməsi nəzərdə tutulur”, - deyə o qeyd edib.

İşğaldan azad edilmiş ərazilərdə yaradılan və bərpa olunan muzeylərin də ayrıca istiqamət təşkil etdiyini bildirən Fuad Maqsudovun sözlərinə görə, burada da QR kodlardan və eksponatlar haqqında məlumatların Vahid Mədəniyyət Reyestrinə inteqrasiyasından tutmuş, virtual reallıq və 360 dərəcəlik virtual turlara qədər müasir rəqəmsal həllərin tətbiqi planlaşdırılır: “Bununla yanaşı, işğaldan azad edilmiş ərazilərdə tarix və mədəniyyət abidələrinin sənədləşdirilməsi üçün artıq rəqəmsal texnologiyalardan istifadə olunur. Xüsusilə GIS, LiDAR, pilotsuz uçuş aparatları, fotogrammetriya və 3D modelləşdirmə texnologiyalarından tətbiq edilir. Bu texnologiyalar mədəni irs obyektlərinin dəqiq rəqəmsal modellərinin yaradılmasına, onların monitorinqinin və sənədləşdirilməsinin aparılmasına, həmçinin əldə olunan məlumatlardan bərpa işlərinin planlaşdırılması zamanı istifadəyə imkan verir”.

Beləliklə, Azərbaycanda muzey sahəsinin rəqəmsal transformasiyası yalnız eksponatlar haqqında məlumatların elektron formata keçirilməsini deyil, həm də mədəni irsin ziyarətçilərə yeni formada təqdim edilməsinə və rəqəmsal şəkildə qorunmasına imkan verəcək texnologiyaların tətbiqini nəzərdə tutur.

Gundemxeber.org

Qəbələ festivalı 15 illiyini qeyd edir və musiqini, incəsənəti, müxtəlif mədəniyyətlərin nümayəndələrini bir araya gətirir. “Gabala Fest” festivalı konsertlər çərçivəsindən kənara çıxaraq, sənətçilərin ünsiyyəti və birgə fəaliyyəti məkanı yaradır.

Gundemxeber.org xəbər verir ki, bu barədə “Euronews” telekanalının Qəbələdə keçirilən musiqi festivalına həsr olunmuş reportajında məlumat verilir.

Vurğulanır ki, festival bu il ənənəvi konsert proqramının hüdudlarından kənara çıxaraq müxtəlif ölkələrdən musiqiçiləri, rəssamları və sənətçiləri bir araya gətirən “Gabala Fest” layihəsinə start verib.

“İştirakçıların sözlərinə görə, klassik musiqi və muğamdan müasir ifalaradək festival yeni ideyaların axtarışı üçün məkan yaradır, eyni zamanda mədəni ənənələrə ehtiram göstərir. “Mədəniyyətlərin kəsişməsi” adlı bədii sərgi də 30-dan çox yerli və xarici rəssamı bir araya gətirib”, - deyə reportajda qeyd olunur.

Telekanal qeyd edir ki, 2027-ci ildə mədəni proqramın daha da genişləndirilməsi planlaşdırılır.

Gundemxeber.org