Bu günlərdə məhkəməsi davam edən və Azərbaycan təhsil tarixinin ən qalmaqallı və önəmli fiqurlarından olan Kamran Əsədov barədə 

Ekspert Rəyi:

Əvvəla, etiraf etməliyik ki, Kamran bəy, doğrudan da, çox savadlı və potensiallı bir insandır. Zatən hələ iyirmi yaşlardan etibarən, vəzifədə olmadığı halda, təhsilin gündəmini müəyyən etməsi də bunu sübut edir. Onun intellektual potensialı, o qədər mühüm və yüksəkdir ki; demək olar, hakimiyyət içərisində bu cür savadlı şəxslərin sayı, maksimum 4-5 nəfər olar. (Misal: Hikmət Hacıyev, Zahid Oruc ).

Heç bir xüsusi media resursu, inzibati dəstək və maliyyə vasitələri olmadan, fikri və mövqeyi, hətta bəzən Təhsil nazirini ya da DİM rəhbərini belə, geridə qoyan bir təsirə sahibdir.

Bu cür perspektivli və effektiv şəxslər isə, əgər eqoistdirlərsə, gec-tez "güc zəhərlənməsi" yaşayırlar. Onlar, inersik durum və nüfuzları ilə qane olmur və beləliklə daha çoxunu istəyir; ya maliyyə, ya da vəzifə olaraq, potensiallarına adekvat bir gözləntiyə qapılır və buna görə də ya hamıdan daha varlı, ya da hamıdan daha "yuxarı"da olmaq istəyir və istedadlarını, bu məqsədə kökləyirlər.

Və əgər gözləntiləri, inzibati olaraq (dövlət baxımından) doğrulmursa və yüksək vəzifə ala bilmirlərsə, ən azından, daha çox maliyyəyə sahib olmağa çalışırlar.

Burda bir haşiyə çıxaq; əslində, Kamran Əsədov, indi çox populyar olan Hikmət Hacıyev qədər, dövlətdə və hakimiyyətdə ciddi təsirə sahib ola bilərdi. Sadəcə olaraq, onun, daha strateji düşünməməsi, tələskən olması və varlanmaq ehtirasının, vəzifə istəyindən daha ön planda olması, karyerasını və aqibətini təyin etmişdir.

Belə ki, hələ 2014-cü ildə, cəmi bir neçə min "qabağa düşmək" üçün yaxalandığı dələduzluq və nüfuzdan sui-istifadə faktından sonra, cinayətə cəlb olunması və "notarial reputasiyası"nın korlanması, dövlət və inzibati seqmentdə karyera şansını, bəribaşdan məhdudlaşdırmışdır.

Əlbəttə, irəliləyən illərdə, o, alternativ inzibati və digər imkanları yoxlamağa çalışmış, bəzi epizodik hallarda müəyyən nəticələr də əldə etmişdir (əlaqəli litseyə lisenziya almaq və s.).

Lakin, yenə də, gözləntiləri tam doğrulmamış; dövlətdən, arzuladığı mövqe və imkanları əldə edə bilməmişdir.

Ki, bunda; reputasiyasındakı cinayət faktı ilə yanaşı, bəzi hallarda təhsil avtoteritləri ilə yaşadığı gündəmlər və konfliktlər də rol oynamışdır.

Zaman-zaman yol verdiyi kəskin mövqe dəyişikliyi və riskli manevrlər, ona, bəlkə, taktiki və qısa vədəli hansısa imkanlar bəxş etsə də, uzun vədədə isə, dövlət nəzərində, "riskli və güvənilməz" obrazını formalaşdırmışdır.

Və bu durum, görünür ki, müəyyən dövrdən sonra; perspektivli, amma səbrsiz Kamranı yormuş və tam taktiki və avanturist meyillərə yönəltmişdir.

Bu isə, birincisi; onun, avtoritetlərə və rəsmilərə qarşı, daha sərt və aşındırıcı mövqe və davranışlarına rəvac vermişdir.

İkincisi və ən əsası; daha qısa yoldan və daha konkret "qazanc"a sıx bağlamışdır.

Təsadüfi deyil ki, 2025-ci ildə; yenidən yol verdiyi, bu dəfə böyük saxtakarlıq və dələduzluq, eləcə də, nüfuzdan sui-istifadə faktı, aşkara çıxmışdır. Hansı ki, bu, 11 il ərzində hələ məlum olan ikinci maxinasiya faktıdır. (Çünki, əvvəlki illərdə, imtahanla bağlı saxtakarlıqlar, texniki imkanların məhdud olması və daha az diqqət səbəbindən, daha az ifşa olunurdu).

Lakin, yol verdiyi aşkar olan ağır cinayətlərə baxmayaraq, o, (əvvəlki nümunədə olduğu kimi) yüngül cəza ilə, hətta, "ev həbsi" ilə də xilas ola bilərdi və görünür ki, son aylarda ETN-ə etdiyi ciddi reveranslar və ilginc çıxışlar da, bu gözləntini reallaşdırmaqla bağlı idi.

Amma, ETN rəhbərindən fərqli olaraq, ona, patoloji antipatiya bəsləyən və keçmişi unuda bilməyən DİM rəhbəri Məleykə Əsədovanın qəti və ardıcıl mövqeyi, görünür ki, bu "qapı"nı da bağlamışdır.

YEKUN

Əvvəldə də qeyd etdiyimiz kimi, Kamran Əsədov, elə bir şəxsdir ki, cəmiyyətimizdə çox nadir olan intellektə və manevr potensialına sahibdir. Və zatən həbsindən qısa müddət öncə belə, "yağlı" vəzifəyə düzələ bilməsi, bunu göstərir.

O, bir neçə il sonra azadlığa çıxacaq və yenə də potensialından və bacarığından istifadə edib, insanları, xüsusən də təhsil ictimaiyyətini çaşdırmağa və yönəltməyə (obrazlı desək: "fırlatmağ"a) davam edəcəkdir. Yenə də on minlərcə sadəlövh təhsilverənin güvənini qazanıb, müəyyən problemləri gündəmə gətirəcək, sonra da həlledici anda, onları, yarıyolda qoyacaqdır.

Amma, artıq ikinci cinayət faktı və məhkumluq; hazırki inzibati seqmentdə, önünü, fikrimizcə, tam kəsmiş olacaqdır və bu da onun, gələcəkdə daha müxalifyönümlü və daha sərbəst olmasına səbəb olacaqdır.

İndiyəqədər, əsasən, təhsil sahəsinə köklənən bu şəxsin; gələcəkdə, daha fərqli, daha universal və daha aktual sahələrə nüfuz etməsi, baş verəcək və K. Əsədov, ən "karlı" və "cəlbedici" sahə olan-ictimai-siyasi platformada, özünün, "yenilənmiş" obrazını qəbul etdirəcəkdir.

İndi onu saxtakarlıqda qınayan on minlərcə insan, bir neçə il sonra, savadlı çıxışlarına və "cəsarəti"nə görə alqışlayacaqdır və bu adamın "ləkəli keçmiş"ini, əsasən, unudacaqdır. Nə qədər qəribə olsa da, 2 dələduzluq və saxtakarlıq hökmünə rəğmən, onun, uzun vədədə, Azərbaycanda ən mühüm postları tutması belə, tamamilə real məsələdir.

Qeyd: K. Əsədovun fürsətcilliyini və avanturistliyini qınamaq; heç də, digərlərinin stratejik, ağıllı və məqbul istiqamətli olmasını söyləmək anlamına gəlmir. Sadəcə olaraq, o, digərlərindən fərqli olaraq, öz qeyri-məşru məqsədlərinə çatmaq üçün belə, daha səbatsız və tələskən vasitələrdən istifadə etmişdir.

"Təhsil Araşdırmaları Mərkəzi"nin eksperti, sosioloq Emin Mirzəli

Gundemxeber.org

Azərbaycanda gecəyarısı, ya da qeyri-iş günü qiymətləri qaldıran qurumun yalnız Tarif Şurası olduğunu bilirdik. Demə, siam əkizi kimi, Tarif Şurasının da şəriki var imiş. Buna bir medalın iki üzü də demək olar. Söhbət Azərbaycan Həmkarlar İttifaqı Konfederasiyasının (AHİK) bu ilin mayında qəbul etdiyi qərardan gedir. Belə ki, AHİK Tarif Şurası kimi xəlvəti iş görərək kurort zonalarına göndərişlə (putyovka) bağlı absurd addımlar atıb, yeni əsassız qaydalar müəyyən edib.

Gizli qiymət artımına gedən qurumun biri az idi, indi ondan geri qalmayan AHİK putyovkalarla bağlı hamını narazı salan qərarlar qəbul edib.

Redaksiyamıza verilən məlumata görə, Sahib Məmmədovun quruma sədr gəlişindən sonra AHİK əvvəlki rəhbərliyə şükür etdirməyə başlayıb. Belə ki, putyovkaların verilməsində yeni absurd qaydalar kütləvi narazılığa səbəb olub. AHİK yeni qaydalara əsasən, göndərişi bundan sonra yalnız işləyənlərin özünə şamil edəcək. Yəni həmin şəxsin ailə üzvlərinə heç bir güzəşt nəzərdə tutulmur. Halbuki əvvəllər ailə üzvünə və ümumiyyətlə 15 faiz güzəşt olunur, 18 yaşa qədər uşaqlara pulsuz göndəriş verilirdi. Sahib Məmmədov isə belə qərara gəlib ki, göndəriş yalnız bir nəfərə aid olmalıdır, yerdə qalanlar isə kurort mərkəzində tam ödəniş etməlidirlər. Daha dəqiq desək, həm həyat yoldaşı, həm də 12 yaşdan yuxarı uşaqlar üçün tam ödəniş olunmalıdır. Hərçənd ötən ilə qədər belə deyildi. İndi yalnız 12 yaşadək yalnız ailədən olan iki uşaqa ödənişsiz putyovka nəzərdə tutulub.

Bu da AHİK rəhbərliyinin tam absurd , gülünc və əsası olmayan yanaşmasıdır. Bununla Sahib Məmmədov və komandası 18 yaşına çatmamış şəxslərin - yəni uşaqların əməyə cəlb olunmasını təşviq edir. Faktiki isə bu yanaşma qanunvericiliyə qarşı çıxmaq, 18 yaşa çatmamış şəxsləri işləməyə məcbur etməkdir. Necə ola bilər ki, 12 yaşdan yuxarı uşaq, icbari təhsil alan yeniyetmə bu güzəştli göndərişlərdən məhrum edilsin? Məgər o yaşda uşaqlar işləyirlər ki, AHİK onlar istisna edir? Onsuzda dövlətdən az məvacib alan valideyin iki övladı üçün yüz faizli ödənişi necə etsin? Axı onlar da məktəblidirlər. Bir sözlə, birbaşa qanuna və dövlət başçısının qərarlarına qarşı kütləvi narazılığ yarada bilən addımlardır. Eyni zamanda, ailənin bütün üzvlərinin güzəştdən məhrum olunması və göndərişin yalnız bir nəfərə aid edilməsi il ərzində bu quruma axan vəsaitlərin hara xərcləndiyini aktuallaşdırır.

Ona görə də Prezident İlham Əliyevə müraciətdə bu məsələnin ciddi şəkildı nəzarətə götürülməsi xahiş olunur. AHİK sədri Sahib Məmmədovun rəhbərliyi altında verilən bu qərarın heç bir insanlığa və qanunlara sığışmadığı vurğulanır. Müraciətdə prezidentdən xahiş edilir ki, AHİK rəhbərliyinin fəaliyyətinin yoxlanılmasına tapşırıq verilsin. Çünki təftiş nəticəsində maliyyə mənimsəmələri, putyovka biznesi , bayram biletləri və bu işdə böyük maxinasiyalar, korrupsiya oyunları üzə çıxa bilər. Prezidentə müraciətdə deyilir ki, Sahib Məmmədov və AHİK heç bir məntiqlə uzlaşmayan qərar qəbul edib. Əvvəla, il ərzində AHİK xəzinəsinə axan maliyyə əvvəlki qaydalarla, yəni ailənin bütün üzvlərinə güzəşt olmaqla göndəriş verilməsini ehtiva edir. Yəni həmkarlara maaşlardan tutulan pullar və s. hesabına böyük vəsait daxil olur. Bu da imkanların olduğunu deməyə əsas verir. İkincisi, icbari təhsil alan 12 yaşdan yuxarı uşaqlar üçün kurort bölgəsində bütün pulun ödənilməsini ailənin boynuna qoymaq qanunlara tüpürməkdir. Eyni zamanda, 15 faizlik güzəştin tamamilə göstərilən qaydada ləğvi özbaşına bir qərardır.

Odur ki, cənab Prezidentin və yaxud Mehriban xanımın məsələni nəzarətə götürməsi təxirəsalınmaz məsələdir. Belə çıxır ki, AHİK adı putyovka, özü "kababtirovka" kimi hoqqabazlıq olan əməllərin sahibidir. Bu əməllərin sahibi isə sədr Sahib Məmmədovdur. Məlumatlarda bildirilir ki, 2024-cü ildən bu posta gətirilən Məmmədov təxminən iki ilə qurumu elə günə qoyub ki, görünən dağa nə bələdçi. Fakt budur ki, yüzlərlə vətəndaşın hüquqlarının pozulmasına səbəb olan qərarlar verilib.

İndi yaxşı olar ki, AHİK rəhbərliyi bu məsələlərə aydınlıq gətirsin və əsaslandırmağa çalışsın. Çünki edilən şikayətlər, vətəndaş müraciətləri ciddi narahatlıqdan xəbər verir. Yüzlərlə insanın hüquqları tapdanıb və məsələyə izah verilməlidir.

Əvvəlcə, AHİK aşağıdakı şikayətlərlə bağlı suallarımıza münasibət bildirməklə yaxşı olardı ki, bu məsələlərə bir izah versin:

1 .Hansı əsasla qanunvericiliyə zidd addım atılıb?

12 yaşdan yuxarı uşaqlara güzəştlərin ləğvi barədə qərar hansı meyarlar və qanunlar əsasında verilib?

2 .AHİK bu qaydanın tətbiqində vətəndaşların maddi şəraitini , aylığ məvacibini nəzərə alıbmı?

3 .İl ərzində quruma gələn vəsaitlər və xərclər barədə hesabatlılıq varmı və ictimaiyyətə dürüst məlumatlar açıqlanıbmı?

4.Göndərişlər, yəni putyovkalar verilərkən vətəndaşın hansı göstəriciləri əsas götürülür, siz bu qaydanı ədalətli sayırsınızmı?

Göründüyü kimi, bu və ya digər suallar, çoxdur, açıq qalır. Cəmiyyətdə dövlət başçısına müraciətdə AHİK-lə bağlı yaranmış gərginliyə, qurumun özbaşına və ədalətsiz qərarlarına dair araşdırmalar aparılmasına reaksiya, gözləyir. Vətəndaşlar dövlətə güvənir, prezident İlham Əliyevə inanır,amma məmurlar görünən iş kimi, bu şəkildə xalqı narazı salırlar...

 Gundemxeber.org

Şeyxülislam Allahşükür Paşazadənin adını hallandıran kimdir?

 Binəqədi rayonunun Biləcəri qəsəbəsi, Asif Zeynallı küçəsi 33B ünvanında — “Ağ Saray” şadlıq sarayının arxasında söküntü və tikinti işlərinin aparıldığı haqda redaksiyamıza videoçəkiliş daxil olub.

Daxil olan videoçəkilişlərdə ərazidəki bir sıra yaşayış evlərinin satın alınaraq söküldüyü və yerində genişmiqyaslı tikinti işlərinin başlandığı görünür. Məlumata görə, söküntü prosesi zamanı ərazidə olan çoxsaylı ağaclar da məhv edilib.

Ərazidə aparılan tikinti ilə bağlı digər ciddi iddialar da mövcuddur. Bildirilir ki, tikinti işlərini həyata keçirən sahibkar Binəqədi Rayon İcra Hakimiyyəti başçısının müavini Hacıbaba Babayevlə yaxın münasibətlərə malikdir. Həmçinin tikinti işlərinə rayon İcra Hakimiyyətinin başçısı Elxan Allahverdiyev tərəfindən razılıq verildiyi iddia olunur. Mənbələrin verdiyi xəbərə görə, söküntü və tikinti işlərinin hüquqi əsasları, eləcə də layihə və icazə sənədləri natamamdır.

Xüsusilə yaşayış evlərinin sökülməsi, yeni tikinti icazələrinin varlığı, ağacların qanunsuz kəsilməsi və yaşıllıqların məhv edilməsi ilə bağlı aidiyyəti qurumların ictimaiyyətə rəsmi açıqlama verməsi zəruridir.

Məsələ ilə bağlı Binəqədi Rayon İcra Hakimiyyətinə, eləcə də aidiyyəti şəhərsalma və ekologiya qurumlarına rəsmi sorğu ünvanlanıb.

Gundemxeber.org olaraq, yazıda adıçəkilən şəxslərin də mövqeyini dinləməyə hazırıq.

Gundemxeber.org

Nizami rayonunda, Şirin Mirzəyev küçəsi 68A və 76A ünvanlarında yaşayan sakinlərin gundemxeber.org-un redaksiyasına müraciəti ciddi suallar doğurur. Sakinlərin iddiasına görə, iki yaşayış binasının arasında onsuz da məhdud olan həyət ərazisində əvvəldən sənədsiz və yarımçıq vəziyyətdə olan tikiliyə sonradan tikinti və istismar baxımından sənədləşmə verilib.

Sakinləri narahat edən əsas məsələ isə həmin obyektin yerləşdiyi ərazinin şəhərsalma normalarına uyğun olub-olmamasıdır.

Azərbaycan Respublikasının Şəhərsalma və Tikinti Məcəlləsinin 69-cu maddəsinə əsasən, yaşayış məntəqələrində tikinti obyektləri arasında müəyyən ara məsafələri saxlanılmalı, həmin məsafələrdə yerüstü tikinti obyektlərinin inşasına yol verilməməlidir. Tikintiyə icazə isə şəhərsalma və tikinti üzrə normativ sənədlərə zidd olmamalıdır.

Bundan başqa, Bakı şəhərində tikinti obyektlərinin tikintisinə və istismarına icazələrin verilməsi Dövlət Şəhərsalma və Arxitektura Komitəsinin səlahiyyətlərinə aid edilir. Komitənin öz məlumatına görə, tikinti obyektinin dövlət reyestrinə daxil edilməsi üçün torpaq sahəsi üzərində hüququ təsdiq edən sənəd, şəhərsalma əsaslandırması və ya müfəssəl plandan çıxarış, layihənin memarlıq-planlaşdırma bölməsi və digər məlumatlar təqdim edilməlidir.

Bu baxımdan sakinlərin qarşısında çox konkret suallar dayanır:

Şirin Mirzəyev 68A və 76A binaları arasındakı əraziyə dair torpaq hüququ hansı sənədlə təsdiqlənib?

Sözügedən tikili üçün şəhərsalma əsaslandırması aparılıbmı?

Obyektin yaşayış binalarına olan faktiki məsafəsi yerində ölçülübmü?

Sakinlərin həyətə, keçidə və ümumi istifadədə olan əraziyə çıxış imkanları nəzərə alınıbmı?

Əgər sakinlərin bildirdiyi kimi obyekt iki binanın arasında dar keçiddə, yaşayış binalarına təxminən 5–6 metr məsafədə yerləşirsə, bu məsələ yalnız sənədin mövcudluğu ilə bitmir. Əsas sual həmin sənədin qanunvericiliyin bütün tələblərinə uyğun hansı əsaslarla verilməsidir.

Komitənin açıq məlumatlarına əsasən, tikinti və istismar icazələri müvafiq şəhərsalma sənədləri və layihə materialları əsasında rəsmiləşdirilməlidir.

Bu səbəbdən sakinlər Dövlət Şəhərsalma və Arxitektura Komitəsindən məsələyə yerində baxılmasını, obyektin yerləşmə məsafələrinin ölçülməsini, torpaq və şəhərsalma sənədlərinin araşdırılmasını və verilmiş icazənin hansı hüquqi əsaslarla rəsmiləşdirildiyinin açıqlanmasını xahiş edirlər.

Sakinlərin mövqeyi sadədir: əgər tikili bütün şəhərsalma və tikinti normalarına uyğundursa, bunun sənədlərlə ictimaiyyətə izah edilməsində heç bir problem olmamalıdır. Əgər uyğunluq yoxdursa, verilmiş icazənin hansı əsasla rəsmiləşdirildiyi araşdırılmalıdır.

Bu müraciətin məqsədi hər hansı vəzifəli şəxsi əvvəlcədən qanun pozuntusunda ittiham etmək deyil. Məqsəd sakinlərin haqlı suallarına rəsmi və əsaslandırılmış cavab almaqdır.

Şirin Mirzəyev 68A və 76A sakinləri adından tələb: obyektə yerində baxış keçirilsin, sənədlər və şəhərsalma əsasları araşdırılsın, nəticə sakinlərə açıqlansın və qanun pozuntusu müəyyən edilərsə, müvafiq tədbirlər görülsün.

Gundemxeber.org redaksiyası olaraq, yazıda adıçəkilən rəsmi qurumların və tikintini həyata keçirən şirkətin rəhbər şəxslərinin mövqeyini dinləməyə hazırıq.

Redaksiyamıza daxil olan məlumatlarda Naxçıvan Muxtar Respublikasının Babək rayon Tarix-Diyarşünaslıq Muzeyinin fəaliyyəti və müəssisənin rəhbərliyi ilə bağlı ciddi narazılıqların olduğu bildirilir. Səsləndirilən iddialar həm direktorun işə münasibəti, həm də muzeydəki tarixi eksponatların qorunması məsələləri ilə bağlıdır.

Babək Rayon Tarix-Diyarşünaslıq Muzeyi 1981-ci il dekabrın 18-də mərhum prezident Heydər Əliyevin təşəbbüsü ilə yaradılıb. Hazırda muzeyin fondunda rayonun tarixini əks etdirən 3500-dən çox eksponatın olduğu rəsmi məlumatlarda qeyd edilir. Müəssisənin əsas vəzifəsi isə bu maddi-mədəni irsin qorunması, öyrənilməsi, nümayişi və təbliğidir.

Məhz buna görə gundemxeber.org-un redaksiyasına daxil olan məlumatlarda səsləndirilən iddialar xüsusi narahatlıq doğurur.

Muzey əməkdaşlarının bildirdiyinə görə, direktor Sərxan Abdullayev iş vaxtının böyük hissəsini müəssisədən kənarda keçirir və muzeydə rəhbər kimi üzərinə düşən vəzifələri lazımi səviyyədə yerinə yetirmir. İddialara əsasən, direktorun Naxçıvan Respublika Xəstəxanasında bufet fəaliyyəti ilə məşğul olduğu və bu səbəbdən muzeydə mütəmadi iştirak etmədiyi bildirilir.

Əməkdaşların sözlərinə görə, direktor muzeyə əsasən rəsmi tədbirlər zamanı gəlir. Bu məlumatların həqiqətə uyğun olub-olmaması isə aidiyyəti qurum tərəfindən aparılacaq xidməti araşdırma zamanı aydınlaşdırılmalıdır.

Daha ciddi iddia isə muzeyin tarixi eksponatlarının qorunması ilə bağlıdır.

Redaksiyaya daxil olan məlumatda muzeyin keçmiş əməkdaşı Leyla xanımın sözlərinə istinadən bildirilir ki, təxminən 300 illik tarixi dəyərə malik olduğu deyilən bir eksponat vaxtında qeydiyyata alınmayıb və sonradan başqa bir əməkdaş tərəfindən götürülüb. Məlumata görə, bu barədə muzey rəhbərliyinə və Naxçıvan Muxtar Respublikasının Mədəniyyət Nazirliyinə məlumat verilsə də, məsələyə lazımi münasibət göstərilməyib.

Bu iddia xüsusilə ciddi araşdırma tələb edir. Çünki muzeyin əsasnaməsində müəssisənin başlıca vəzifələri sırasında maddi mədəniyyət nümunələrinin komplektləşdirilməsi, mühafizəsi, öyrənilməsi və nümayişi birbaşa göstərilir.

Başqa sözlə, söhbət adi bir əşyadan deyil, xalqın keçmişinə aid olduğu iddia edilən tarixi nümunədən gedirsə, onun qeydiyyatsız qalması, itməsi və ya mənimsənilməsi ilə bağlı hər bir məlumat ciddi şəkildə yoxlanılmalıdır.

Rəsmi məlumatlara əsasən, Babək Muzeyində 3500-dən çox eksponat qorunur. 2025-ci il üzrə Naxçıvan Mədəniyyət Nazirliyinin hesabatında da muzey ayrıca mədəniyyət müəssisəsi kimi göstərilir və fondun qorunması məsələsinin əhəmiyyəti bir daha ortaya çıxır.

Müraciət edən şəxslər direktorun bu cür rahat davranmasının səbəbini onun yüksək vəzifəli şəxslərlə əlaqələrinin olması ilə izah edirlər. Lakin bu, hazırda yalnız müraciət edənlərin irəli sürdüyü iddiadır və həmin iddianı təsdiqləyən müstəqil sənədlər redaksiyaya təqdim edilməyib.

Bu səbəbdən məsələnin şəxsi mübahisə müstəvisində deyil, rəsmi araşdırma çərçivəsində qiymətləndirilməsi daha doğru olardı.

Əsas sual isə budur: Ulu Öndərin təşəbbüsü ilə yaradılmış, rayonun tarixini və mədəni irsini qoruyan bir muzeydə rəhbərin fəaliyyətinə və tarixi eksponatların mühafizəsinə kim nəzarət edir?

Əgər səsləndirilən iddialar əsassızdırsa, onların rəsmi şəkildə təkzib edilməsi cəmiyyət üçün vacibdir. Əgər iddialarda həqiqət payı varsa, o zaman məsul şəxslər qarşısında qanunvericiliyə uyğun tədbirlərin görülməsi daha da vacibdir.

Redaksiya olaraq bildiririk ki, Sərxan Abdullayevin və Naxçıvan Muxtar Respublikasının Mədəniyyət Nazirliyinin mövqeyini dərc etməyə hazırıq. Çünki söhbət təkcə bir direktorun fəaliyyətindən deyil, Babəkin tarixi yaddaşını qoruyan dövlət muzeyindən gedir.

Gundemxeber.org

Paytaxtın Xəzər rayonunun Zirə qəsəbəsində torpaq mübahisəsi yenidən gündəmə gəlib. Sakin Samil Musayev deyir ki, ailəsinə məxsus 12 hektar torpaq sahəsi təxminən 10-15 il əvvəl onun əlindən alınıb və bu ərazi sonradan daha böyük torpaq massivinə birləşdirilib. Samil Musayevin sözlərinə görə, torpağın əvəzində ona başqa ərazidə sahə veriləcəyi vəd olunub. Lakin iddiaçı bildirir ki, nə vəd edilən torpaq sahəsi ona təqdim edilib, nə də 12 hektar torpağa görə hər hansı ödəniş həyata keçirilib.

Gundemxeber.org xəbər verir ki, Samil Musayev bir neçə gün əvvəl Baku TV-yə müraciət edərək məsələ ilə bağlı danışıb. Onun sözlərinə görə, torpaq sahəsinin ailəsinə məxsus olduğunu təsdiqləyən sənədləri, o cümlədən çıxarış və arxiv materialları mövcuddur.

Şikayətçi iddia edir ki, torpağını geri tələb etdikdə ona faktiki olaraq “hara istəyirsən, şikayət et” məzmununda cavab verilib. Son illərdə Zirə ərazisində böyük torpaq massivlərinin ayrı-ayrı şəxslərin və kommersiya strukturlarının nəzarətinə keçməsi ilə bağlı müxtəlif iddialar səsləndirilib. Bu iddiaların bir hissəsində Prezident Adminstarsiyasının sabiq rəhbəri, hazırda istintaq altında olan Ramiz Mehdiyevin adı hallanır.

Məlumatlara görə, Ramiz Mehdiyevin partonajlığı altında Zirədə müxtəlif illərdə böyük torpaq sahələrində göbələk təsərrüfatları, istixanalar və zeytun bağları yaradılıb. Samil Musayevin 12 hektar torpaq sahəsi də məhz Mehdiyevin 1000 hektar torpağına qatılıb. Sakinlərin torpaqlarının aldadılma, müxtəlif vədlər və təzyiq yolu ilə əllərindən alındığı barədə məlumatlar mövcuddur. Zirədə söhbət ümumilikdə 1000 hektara yaxın torpaq massivindən gedir.

Bu torpaqların hansı hansı əsaslarla əldə edilməsi və hazırda hansı hüquqi şəxslərin və ya fiziki şəxslərin nəzarətində saxlanılması isə ciddi araşdırma tələb edən məsələlərdəndir. Samil Musayevin torpaq tələbinə “göbələk Feyruz” kimi tanınan Mehdiyevin adamı Feyruz Xanbala oğlu Rzayev “get hara istəyirsən şikayət elə” şəkilində cavab verib. Maraqlı məqam ondan ibarətdir ki, Ramiz Mehdiyev hazırda istintaq çərçivəsində hüquqi prosedurlarla üz-üzədir. Bununla belə, onun ailəsi və yaxın çevrəsi müxtəlif daşınmaz əmlak və torpaq sahələri üzərində nəzarəti davam etdirirlər.Gələn məlumatlarda Zirədə zəbt olunmuş torpaq massivi Feyruz Xanbala oğlu Rzayevin üzərindən idarə olunur. Digər tərəfdən, bəzi iddialarda Ramiz Mehdiyevin kürəkəni, keçmiş deputat İlham Əlisəftər oğlu Əliyevin də bu ərazilərlə bağlı proseslərdə rolunun olduğu bildirilir. Zirə məsələsi Ramiz Mehdiyevin ailəsi və yaxın çevrəsi ilə bağlı illər ərzində səsləndirilən digər torpaq və daşınmaz əmlak iddialarını da gündəmə gətirir. Belə iddialar sırasında Abşeron rayonunun Novxanı qəsəbəsində 155 hektara yaxın torpaq sahəsi xüsusi yer tutur. Sözügedən ərazidə böyük təsərrüfat və üzüm bağlarının salındığı bildirilir. Novxanı və Saray bağları istiqamətində isə ayrı-ayrı vətəndaşların torpaqlarının və Xəzər dənizinin mühafizə zolağına aid ərazilərin hasarlanaraq müxtəlif mülklərə birləşdirilməsi ilə bağlı da iddialar səslənib.

Bundan başqa, Quba rayonunun Xınalıq kəndi ərazisində 50 hektar torpağın, Goranboy, Abşeron və Bakıətrafı ərazilərdə isə ümumilikdə 216 hektardan artıq kənd təsərrüfatı təyinatlı torpaq sahəsinin Mehdiyev ailəsinin və ya onun çevrəsinin nəzarətində olduğu barədə məlumatlar yayılıb. Ailə üzvlərinin adına müxtəlif torpaq sahələrinin rəsmiləşdirildiyi də iddialar sırasındadır. Məsələn, Maştağa qəsəbəsində Qalina Mehdiyevanın adına 892 sot, Bakıətrafı ərazilərdə isə qızı Kamilə Əliyevanın adına 240 sot torpaq sahəsinin olduğu bildirilir. Şabran rayonunda isə kürəkəni İlham Əliyev yerli sahibkar Mansur İbrahimova məxsus təxminən 100 hektarlıq meyvə bağlarını ələ keçirib.

Mehdiyev ailəsinin əmlakları ilə bağlı yayılan məlumatlar yalnız kənd təsərrüfatı torpaqları ilə məhdudlaşmır.

Bakının Tbilisi prospektində 36 sot torpaq sahəsində yerləşən villa, Əhmədli qəsəbəsində “Şərq-Qərb” nəşriyyatının ərazisində inşa edilmiş 408 mənzilli, 16 mərtəbəli yaşayış binası, Dilarə Əliyeva küçəsi 251A və İstiqlaliyyət küçəsi 11 ünvanlarındakı obyektlər, eləcə də 5 min kvadratmetrdən artıq sahəyə malik “Qrandezza” Ticarət Mərkəzi də müxtəlif vaxtlarda Mehdiyev ailəsi ilə əlaqələndirilən əmlaklar sırasında göstərilib. Bu əmlakların hansı hissəsi qanuni yolla əldə olunub, hansı hissəsinin əldə edilməsində vətəndaşların və ya dövlət torpaqlarının hüquqlarının pozulması barədə əsaslı sübutlar mövcuddur.

Samil Musayev isə bu böyük mənzərənin içərisində özünün 12 hektar torpağının taleyini gözləyən vətəndaşdır. Onun sözlərinə görə, torpağa dair sənədləri var və illər ərzində müxtəlif dövlət qurumlarına müraciət edib. Lakin iddiasına görə, indiyədək onun problemi həll edilməyib. Digər tərəfdən, Zirədə yüzlərlə hektarla ölçülən torpaq massivlərinin kimlərin nəzarətində olması barədə iddialar da müvafiq dövlət qurumlarının diqqətində olmalıdır.

Gundemxeber.org

Millət vəkili Məşhur Məmmədov: “…Ya o materialları verənin adını deyin, ya da dərc etsəniz məhkəmədə cavab verəcəksiniz…”

Dövlət müəssisəsində baş verən və videoda aydın şəkildə əks olunan kadrlar sadəcə bir idarədaxili mübahisə deyil, cəmiyyətin mənəvi dəyərlərinə, ədalət prinsipinə və dövlətçiliyə qarşı böyük bir hörmətsizlikdir. General-mayor Natiq Əliyevin qızının dövlət idarəsində törətdiyi bu qalmaqal sadəcə bir özbaşınalıq deyil, bu torpaq üçün canını və sağlamlığını qoyan insanlara qarşı göstərilən açık-aşkar hörmətsizlikdir.

Videoda əks olunan kadrlar insanı dərin təəssüf və təəccüb hissi ilə baş-başa buraxır:

General-mayor Natiq Əliyevin qızı dövlət idarəsində özünü tamamilə qanunlardan və etik çərçivələrdən üstün tutur. Ətrafdakılara, məmurlara və xüsusilə də qaziyə qarşı amiranə, yüksək tonda və təkəbbürlü davranaraq atasının vəzifəsinə arxalandığını açıq-aşkar hiss etdirir. Hətta qazini videoya çəkərək şantaj etməyə çalışması, mühafizəçilərə əmr verib qazini oradan aparmağı tələb etməsi məmur övladının gəldiyi harınlıq həddini nümayiş etdirir.

Digər tərəfdə isə bütün bu təzyiqlərə, hədələrə və hörmətsizliyə ləyaqətlə sine gərən bir Vətən müdafiəçisi var. Bədənindəki qəlpələri, bu torpaq üçün keçdiyi ağır yolları xatırladan qazinin duruşu, təkəbbür qarşısında haqqın və ləyaqətin səsi olur.

Azərbaycan cəmiyyətində bu sualın cavabı çox aydın və qəti olmalıdır: Bu ölkədə haqqı olan vuruşub can verən qazilərdir, yoxsa atasının vəzifəsinə arxalanıb harınlayan məmur övladları?!

Dövlət idarələri hər bir vətəndaşa, xüsusilə də bu vətən üçün canını ortaya qoyan qazilərimizə xidmət etmək üçün vardır. Atasının rütbəsinə və vəzifəsinə güvenib dövlətin idarəsində özbaşınalıq edənlərə qarşı hüquqi və mənəvi müstəvidə ən sərt addımların atılması cəmiyyətdə ədalət hissinin qorunması üçün həyati əhəmiyyət kəsb edir.

Gundemxeber.org

Sumqayıt şəhərinin Koroğlu prospektində yerləşən Dövlət Yol Polisi Şöbəsinin qarşısında apardığımız müşahidələr zamanı diqqətçəkən mənzərə ilə qarşılaşdıq.

DYP şöbəsinin binasından təxminən 20 addımlıq üzbəüz məsafədə daş hasarın üzərinə iri hərflərlə “Hay, Hitler!” yazılması bizi təəccübləndirdi. Bu ifadənin kim tərəfindən və nə vaxt yazıldığı bizə məlum deyil. Lakin yazının dövlət qurumunun düz qarşısında yerləşməsi və açıq şəkildə görünməsi ciddi sual doğurur. Görəsən, hər gün həmin ərazidən keçən DYP əməkdaşları və rəhbər şəxslər bu yazını görmürlərmi?

Xatırladaq ki, bir neçə il bundan öncə Adolf Hitlerə həsr olunmuş «Mənim savaşım» (Mein Kampf) kitabını nəşr etdirdiyinə görə «Xural» qəzetinin baş redaktoru Əvəz Zeynallı həbs edilmişdi. İndi necə olur ki, «Hay, Hitler!» şüarını Sumqayıtın əsas prospektindəki divara yazanlara və buna göz yuman DYP əməkdaşlarına güldən ağır söz deyən olmur?

Məsələnin digər tərəfi isə şöbəyə müraciət edən vətəndaşların vəziyyətidir.

Ərazidə apardığımız müşahidə və vətəndaşlarla söhbətlər zamanı məlum oldu ki, insanlar xidmət almaq üçün uzun müddət növbədə gözləyirlər. Havanın temperaturunun 40 dərəcəyə yaxın olduğu bir gündə vətəndaşların saatlarla küçədə qalması xüsusilə narahatlıq doğurur.

Söhbət etdiyimiz vətəndaşlar gözləmə müddətindən narazılıqlarını bildirdilər.

Vətəndaşlar səhər saat 09:00-dan axşam 19:00-a qədər, 40 dərəcə bürkü altında küçədə növbə gözləməyə məcbur edilir. Üstəlik, saat 13:00-dan 16:00-a dək davam edən anomal nahar fasiləsi süründürməçiliyi pik həddə çatdırır.

Ərazidə gözləyən insanların təbii ehtiyaclarını ödəməsi üçün ümumiyyətlə tualetin olmaması da diqqət çəkən problemlərdən biridir.

Dövlət qurumuna müraciət edən vətəndaşın saatlarla küçədə, isti havanın altında gözləməsi xidmətin təşkili baxımından ciddi suallar yaradır. Əgər vətəndaşların müraciətlərinə vaxtında baxılmırsa, bunun səbəbi nədir? Növbələrin və xidmət prosesinin daha səmərəli təşkilinə niyə nail olunmur?

Ərazidə diqqətimizi çəkən digər məsələ isə “Hay, Hitler!” yazısının hələ də silinməməsidir. Nasist Almaniyasının lideri Adolf Hitlerə aid belə bir ifadənin dövlət qurumunun qarşısında görünməsi, ən azı, aidiyyəti şəxslərin diqqətini çəkməli idi.

Biz burada həmin yazının kim tərəfindən yazıldığını müəyyənləşdirmirik və heç kimi əsassız şəkildə ittiham etmirik. Sadəcə, ərazidə gördüyümüz mənzərəni ictimaiyyətin diqqətinə çatdırırıq.

İstər vətəndaşların saatlarla gözləməsi, istərsə də dövlət qurumunun qarşısında belə bir yazının qalması ilə bağlı aidiyyəti qurumların münasibət bildirməsi vacibdir.

Çünki vətəndaş dövlət idarəsinə öz problemini həll etmək üçün müraciət edir. Onun saatlarla gözləməsi, isti havada küçədə qalması və minimum şəraitdən məhrum olması normal hal kimi qəbul edilməməlidir.

Sumqayıt DYP-də xidmətin təşkili necədir, vətəndaşlar niyə saatlarla gözləyir və dövlət qurumunun qarşısındakı “Hay, Hitler!” yazısı nə vaxtdan oradadır?

Bu sualların cavabını aidiyyəti qurumlardan gözləyirik.

Gundemxeber.org xatırladır ki, Daxili İşlər naziri, general-polkovnik Vilayət Eyvazov vətəndaşların müraciətlərinə həssaslıqla yanaşılması, qanunçuluğun qorunması, etik davranış qaydalarına əməl edilməsi, eləcə də xidməti vəzifələrin dürüst və prinsipial şəkildə yerinə yetirilməsi ilə bağlı dəfələrlə ciddi tapşırıqlar verib. Sual olunur: bu tələb və tövsiyələrə əməl etməyən polis əməkdaşları hansı prinsiplərə əsaslanırlar?

Ümid edirik ki, xidməti fəaliyyətdə rast gəlinən belə xoşagəlməz hallara qısa zamanda tamamilə son qoyulacaq.

Gundemxeber.org

P.S. Ərazidə apardığımız müşahidə zamanı DYP binasının daxilində sığorta şirkətinə qanunvericiliyə uyğun göndərilməli olan “Forma 4” ilə bağlı da diqqətçəkən bir məqamla qarşılaşdıq. Həmin məsələni hazırda özümüzdə saxlayırıq.

Mövzu diqqətimizdədir.

Azərbaycan Respublikası Prezidenti İlham Əliyev və birinci xanım Mehriban Əliyeva avqustun 11-də Naxçıvan Sənaye Parkının təməlqoyma mərasimində iştirak ediblər.

Gundemxeber.org xəbər verir ki, iqtisadiyyat naziri Mikayıl Cabbarov dövlətimizin başçısına və birinci xanıma Naxçıvan Sənaye Parkı barədə məlumat verdi.

Bildirildi ki, bu sənaye parkı Azərbaycan Prezidentinin 2024-cü ildə imzaladığı Fərmanla yaradılıb. Naxçıvan Sənaye Parkının fəaliyyətinin təşkili məqsədilə ilkin olaraq ərazinin istifadəyə yararlı vəziyyətə gətirilməsi, növbəti mərhələdə isə xarici və daxili infrastrukturun, o cümlədən elektrik və istilik enerjisi, qaz, su, rabitə, nəqliyyat, istehsal, inzibati, sosial və digər obyektlərin yaradılması nəzərdə tutulur. Naxçıvan şəhərinin cənub-qərb hissəsində, Naxçıvan-Sədərək avtomobil yolunun cənubunda yerləşən bu sənaye parkı 310 hektar ərazini əhatə edəcək. Artıq sənaye parkına potensial sahibkarların cəlb olunması istiqamətində bir sıra layihələr üzrə danışıqlar aparılır.

Ölkəmizdə hazırda 8 sənaye parkı (Sumqayıt Sənaye Parkı, Mingəçevir Sənaye Parkı, Qaradağ Sənaye Parkı, Pirallahı Sənaye Parkı, Ağdam Sənaye Parkı, Hacıqabul Sənaye Parkı, “Araz Vadisi İqtisadi Zonası” Sənaye Parkı, Balaxanı Sənaye Parkı) fəaliyyət göstərir.

Bundan başqa, Gəncə şəhərinin və Şəmkir rayonunun inzibati ərazilərində yaradılacaq Qərb Sənaye Parkında infrastrukturun qurulması üçün texniki şərtlərin alınması prosesi aparılır.

Bu sənaye parklarında ümumilikdə 184 rezident qeydiyyata alınıb ki, onların da 101-i artıq fəaliyyət göstərir. İndiyədək rezidentlər tərəfindən 7,1 milyard manatdan çox investisiya cəlb edilib, 11 min 500-dən çox iş yeri yaradılıb.

Xatırladaq ki, 2026-cı ilin iyulun 1-ə olan məlumata görə, sənaye parklarında ümumilikdə 21,4 milyard manatlıq məhsul istehsal edilib, bunun da 6,7 milyard manatlıq hissəsi ixrac olunub.

Gundemxeber.org